МӨНХ МАНДАГ ВҮҮЛ ХХК-ИЙН ЭЭРЭХ ҮЙЛДВЭРИЙН ТЕХНОЛОГИЙН АИЖЛТНУУДАД ҮНЭЛГЭЭ ХИЙЛЭЭ.

2024 оны 11 сарын 20-ны өдөр Монголын ноос ноолуурын холбооноос Хөдөлмөр,нийгмийн хамгааллын сургалт, үнэлгээ, судалгааны институттэй хамтран Мөнх мандаг вүүл ХХК-ийн ээрэх үйлдвэрийн технологийн ажилтнуудад ур чадварын үнэлгээг Монгол Солонгосын политехникийн коллежийн мэргэжлийн багш, үнэлгээний ажилтнууд хийлээ.

Мэргэжлийн болон техникийн боловсрол, сургалтын тухай хууль, боловсрол шинжлэх ухааны сайд, Хөдөлмөр нийгмийн хамгааллын сайдын 2023 оны А/513, А/171 дүгээр хамтарсан тушаалаар батлагдсан “мэргэжлийн сургалтын байгууллагын төгсөгчийн чадамжийг үнэлэх, баталгаажуулах, гэрчилгээжүүлэх журам”-ын хүрээнд ээрмэлийн технологийн ажилтнуудын мэргэжлийн ур чадварыг үнэлэх, баталгаажуулалтыг ажлыг амжилттай зохион байгууллаа.

Мөнх мандаг вүүл ХХК-ийн удирдлагууд нь нийгмийн хариуцлагын хүрээнд мэргэшсэн ажилтнууддаа ур чадварын үнэлгээ хийлгэж мэргэжлийн үнэмлэхтэй болгон ажлын байрны тогтвортой байдлыг хангахад ихэд анхаарч, цаашид бусад үйлдвэр цехийн мэргэшсэн ажилтнууддаа ур чадварын үнэлгээг хийлгэж түвшинг нь тогтоох, ажилтнуудынхаа ур чадварыг дээшлүүлэх сургалтыг холбоогоороо дамжуулан тогтмолжуулах ажлуудыг төлөвлөн үе шаттайгаар хэрэгжүүлэхэээр боллоо.

Тус компани нь 2020 оноос хойш ноос, ноолуур, хөөврөн ээрмэл утас үйлдвэрлэж салбарын жижиг дунд үйлдвэрүүдтэй хамтран ажиллахаас гадна хонины ноосон болон сарлагийн хөөврөн бүтээгдэхүүн үйлдвэрлэж, үндэсний өөрийн брэндийг үүсгэх зорилго дор нэгдэн ажиллаж байна.